आई

पावसाचे मोसम आई
किती उलटून गेले
तरी सांग तुझे हात
दुष्काळाशीच कसे लढले

मुक्त वगैरे होता हा देश
तू जन्मलीस तेव्हा आई
या बहरलेल्या वृक्षाचं
एकही फळ तुझ्या पदरात नाही

देशभर सोन्याचा मस्तवाल धूर
भरगच्च होती कोठारं धान्यांची
त्या देशात आयुष्यभर आई
तू करत राहीलीस काटकसर तेलामीठाची

इरकल पैठणी कांजीवरमची
परंपरा मिरवणाऱ्या देशात आई
तुझ्या लुगड्याचा जोड
कधी सुटलाच नाही

प्रसूतीच्या कळा उरात गाडून
तूच दाखवंलस आकाश
तरी विन्मुख कसा सांग
तुला सारा प्रकाश

आयुष्यभर चार भिंतीत राहूनसुद्धा
साऱ्या विश्वाचं दुःख तुझ्या कपाळी कसं ?
आनंदाचं गाणं झऱ्यासारखं प्रसवूनसुद्धा
वेदनेत अखंड नहाणं तुझ्या भाळी कसं ?