चांदण्या

पूर्वी,

तू हसायचीस तेव्हा,

चांदण्या कशा रांगेत उभ्या रहायच्या,

कवायतीला उभं राहणाऱ्या शाळकरी मुलांसारख्या.

पण आज,

तू हसलीस तेव्हा ,

चांदण्या उधळल्यासारख्या वाटल्या,

मैदान कवेत घेणाऱ्या शाळकरी मुलांसारख्या...

                                    ---गणेश गोडसे---

रात्र रंग

*रात्ररंग*

रात्र -  रंग
नाद काळोखात
उशाचा दिवा
चिंब मन-वात

रात्र जागी
उभा साज
मुके अवकाश
कोरे आवाज

मंद स्पंदनात
हरवलं स्वत्व
मंतरलं विश्व
शून्य अस्तित्व

रात्र न्हाते
तुझ्या उन्हात
उशाचा दिवा
चिंब मन-वात

              *गणेश गोडसे*
  पूर्वप्रसिद्धी - किर्लोस्कर फेब्रुवारी 1999