भूकबळी आणि आत्महत्या

भूकबळी आणि आत्महत्या,
हे व्यवस्थेने केलेले खून आहेत...
असं जेव्हा तू म्हणालास -
तेव्हा दचकून मागे फिरलेले लोक
प्रस्थापितांच्या पायाशी जाऊन बसले...
चढत्या आणि उतरत्या आकडेवारीचे घोळ ऐकून
त्यांनी आनंदाने टाळ्या पिटल्या
त्या भाटांनी मग तुला शिव्या घातल्या
आपले अमोल आत्मे कत्तलखान्याच्या खुंटीवर टांगून
उद्याच्या उज्ज्वल भविष्याचे फलक हाती घेऊन ते बाहेर पडले
त्यांच्या काखेतल्या झोळीतील मूठ-मूठ सत्ता ते चाचपून पाहत होते,
क्रांती झाल्यासारखा प्रचंड जल्लोष करत होते
अन उद्याच्या महासत्तेचे ढोल बडवत होते
तू तारस्वरात ओरडत होतास
भूकबळी आणि आत्महत्या ...
पण खरं सांग
त्या पाताळभेदी जल्लोषात तुझा आवाज तुला तरी ऐकू येत होता का?

                -----गणेश गोडसे-------